Vieiros

A enquisa de condicións de vida das familias correspondente ao ano 2007 e elaborada polo Instituto Galego de Estatística, inclúe un apartado específico dedicado á relación da poboación do país coas novas tecnoloxías. A nivel xeral, o estudo amosa un amplo uso da telefonía móbil (do 67,10% da cidadanía galega maior de 5 anos), mais non tan alto do computador (40,80%) e de internet (32,45%).

Por sexos, a nivel xeral os homes usan as novas tecnoloxías en maior medida cás mulleres, cun 71,08, un 43,57 e 34,36 en telefonía móbil, computadores e internet nas persoas de sexo masculino fronte ao 63,41, 38,23 e 30,69 das de sexo feminino. Porén, isto débese principalmente polo avellentamento da poboación. Entre os menores de 40 anos, as mulleres superan aos homes en todos os tramos de idade e en todos os usos de tecnoloxías analizados, coa única excepción dos móbiles de 20 a 29 anos e dos computadores de 5 a 14 anos, en que os homes son usuarios lixeiramente preferentes.

De todos os grupos de idade, os principais usuarios de internet e de computadores son as persoas de entre 15 e 19 anos, co 69,78 e o 86,69%, respectivamente, aínda que na telefonía móbil son superados polo grupo de idade inmediatamente superior, as persoas de 20 a 29 anos, das que menos do 5% prescinde do móbil. No outro estremo están as persoas maiores de 55 anos. Aínda que o móbil está estendido entre o 37,65% das persoas destas idades, só o 7,96% fai uso do ordenador e apenas o 5,85% emprega a internet.

Se nos fixamos na distribución territorial dos usuarios, as provincias occidentais están por diante das orientais, cunha diferenza de arredor de dez puntos. Por exemplo, no uso de internet, a porcentaxe de usuarios coruñeses e pontevedreses é de 34,71 e 34,63, fronte ao 25,63 e o 25,91 de Lugo e de Ourense.