Vieiros

• Relacionada: O sector inmobiliario segue a ser unha das lavadoras preferidas dos narcos

A proposición non de lei sobre a necesidade de estabelecer unha regulación sobre os bens e propiedades confiscados ao narcotráfico foi presentada no Congreso pola deputada pontevedresa do BNG, Olaia Fernández Davila. O asunto chega este martes a debate na comisión mixta para o Estudo do Problema das Drogas, nunha xuntanza que terá lugar desta volta no Senado.

De xeito concreto, a representante do Bloque propón que a esixida reforma garante que estas propiedades incautadas no marco das operacións contra o narcotráfico sexan posteriormente destinadas ao financiamento ou apoio de políticas sociais e, especialmente, de todas aquelas vencelladas a proxectos de apoio a persoas con drogodependencia e en proceso de reinserción. Na opinión de Fernández Davila sería recomendábel que se crease por un lado un depósito xeral de bens confiscados ao narcotráfico (cuestión que a propia Fiscalía Antidroga ten mencionado) e por outra parte que un órgano especializado tivese o encargo de administrar eses bens e propiedades. Ambas as dúas iniciativas irían inseridas no marco dunha regulación específica sobre a xestión e destino destes bens.

Na situación actual, a elevada incautación de propiedades (pazos, apartamentos, barcos...) que tivo lugar nos últimos anos en Galiza, permanece nun estado de "esquecemento e abandono", segundo denuncia a deputada galega na súa argumentación. Interpreta Davila que a saturación e a falta de decisión por parte dos xulgados estarían entre as causas desta situación. Entende ademais a voceira do BNG que a tramitación burocrática e xestión destas propiedades é "complexa" pero, insiste, debido ao actual baleiro legal, de existir regulamento específico para os propios xuíces sería máis doado actuar nestes casos.